Муса Җәлил музей-фатирының үсеш стратегиясе турында фикер алышу

 28 февраль көнне Казандагы Муса Җәлил музей-фатирында (М.Горький ур., 17 йорт) әлеге музейның үсеш стратегиясе турында фикер алышуга багышланган «түгәрәк өстәл» утырышы булды. Аның эшендә Татарстан Республикасы Милли китапханәсе вәкиле дә катнашты.

Татарстан Республикасы Милли музееның генераль директоры, тарих фәннәре докторы Г.Р.Нәҗипованың  кереш сүзеннән соң, Муса Җәлил музей-фатиры мөдире Н.Г.Фәттахова үзләре тарафыннан әзерләнгән стратегия проектын презентацияләде, музейның алга таба тәгаенләнгән төп эшчәнлек юнәлешләре белән җентекләп таныштырды.

Утырышка чакырылган галимнәр, әдипләр, мәдәният һәм мәгариф эшлеклеләре, башка музейларның җитәкчеләре тәкъдим ителгән стратегиягә карата үз фикерләрен белдерде, өстәмәләр кертү кирәклегенә басым ясады, күбесе киләчәктә хезмәттәшлеккә әзер булуларын әйтте. Чыгышларда, аерым алганда, музейның мәйданнарын берничә мәртәбәгә киңәйтү, экспозицияләрен яңарту-тулыландыру, яңа технологияләрне киңрәк куллану, шулай ук Муса Җәлил шәхесен, аның каһарманлыгын, яшәгән чорын, замандашларын, көрәштәшләрен, гаиләләрен киңрәк планда ачу-күрсәтү, яшь буынны музейга ныграк җәлеп итү зарурлыгы яңгырады.

Фотоларда: Муса Җәлилнең үзе исән чакта нәшер ителгән, хәзер Татарстан Республикасы Милли китапханәсе фондларында сакланучы китаплары: