Укы, тегәргә өйрән!
Татарстан Республикасы Милли китапханәсенең вакытлы матбугат бүлеге кул эшләренә караган материаллар бастыручы «Burda», «Verena», «Sandra», «Тылсымлы куллар», «Мастерилка», «Анна», «Модное рукоделие» һәм башка журналлар яздырып ала. Әлеге журналлар битләрендәге файдалы идеяләр тегүчеләр өчен генә түгел, ә яңа эш башлаучыларга да кызыклы. Аларга карап кабатланмас дизайнга нигезләнгән матур әйберләр тегәргә өйрәнергә, көнкүреш нигезендә ятучы төрле күнекмәләр алырга мөмкин.
Халыкара хатын-кызлар көне 8 Март якынлаша. Бу көнне барлык гүзәл затларны сөендерүнең иң яхшы ысулы – үз кулларың белән яхшы бүләк ясау.
Бу бәйрәм алдыннан 2020 елның 1 мартында Татарстан Республикасы Милли китапханәсенең вакытлы матбугат бүлеге хезмәткәрләре (Казан, К.Маркс ур., 36 йорт) «Мастерилка» клубының чираттагы утырышын уздырды.
Башта бүлек хезмәткәрләре «Үз кулларың белән могҗиза яса» дигән күргәзмәне тәкъдим иттеләр, журналларга күзәтү ясадылар.
Әлеге мастер-класста катнашучылар үзләренең күңел җылысын биреп, бар фантазияләрен эшкә җигеп, китапханә хезмәткәрләре ярдәме белән матур тукымадан алъяпкыч тектеләр.
