Төркәр Соукканнан Милли китапханәгә тагын зур бүләк

Татарстан Республикасы Милли китапханәсе Швециядә яшәүче милләттәшебез Төркәр ага Соукканнан янә кыйммәтле басмалар кабул итте. Ул 2019 елда 12 данә уникаль китап бүләк иткән иде инде.

Ерак чит илдәге милләттәшебез быел да Милли китапханәгә бүләк җибәргән. Бу юлы Төркәр ага татар, төрек, фин, швед һәм инглиз телләрендә басылып чыккан 31 исемдәге китап һәм журнал бүләк итә. Аларның гомуми саны 38 данәне тәшкил итә. Алар арасында 1949 елда Финляндиянең Тампере шәһәрендә чыккан, Габдулла Тукай турындагы «Tatar şağıyre Gabdulla Tukay»; Финляндиядәге Ислам җәмгыятенең 50 еллык юбилеена багышлап нәшер ителгән «Suomen Islam Seurakunta. 1925–1975» (1975); Төркестан тарихына багышланган «Doğu Türkistan: tarihi, coğrafi ve şimdiki durumu» (1952); татар-төрек дәүләт һәм җәмәгать эшлеклесе Садри Максуди турында Анкарада дөнья күргән «Sadri Maksudi ve Türk-Fin münasebetleri» (1965) һ.б. китаплар бар.

Милләттәшебез һәдия кылган китаплар Татарстан Республикасы Милли китапханәсенең кулъязмалар һәм сирәк китаплар бүлегендә лаеклы урын алачак. Милли китапханә җитәкчелеге Төркәр ага Соукканга бүләкләре өчен үзенең зур рәхмәтен белдерә.