Булачак экскурсоводлар өчен Милли китапханәдә мәгълүмат сәгате

2020 елның 10–11 март көннәрендә Татарстан Республикасы Милли китапханәсенең татар әдәбияты һәм туган якны өйрәнү бүлеге (Казан шәһәре, Кремль урамы, 33 йорт) хезмәткәрләре В.Г. Тимирясов исемендәге Казан инновацияләр университеты каршында урнашкан колледж (Казан шәһәре, М.Гафури урамы, 71 йорт) студентларына ТАССР оештырылуга 100 ел тулу уңаеннан «Казан шәһәренең тарихи һәм мәдәни һәйкәлләре» дигән темага мәгълүмат сәгате үткәрде.

Әлеге очрашуда Татарстан Республикасы Милли китапханәсенең татар әдәбияты һәм туган якны өйрәнү бүлеге мөдире Г.Ш.Җомаголова бүлекнең оешу тарихы һәм аның бай фондлары турында сөйләде, шулай ук Казан шәһәренең тарихи һәм мәдәни һәйкәлләренә багышланган китаплар белән дә җентекләп таныштырды. Кунаклар өчен гасыр ярымлык тарихы булган Милли китапханәнең затлы залларына баш китапханәче Г.Л.Абдрахманова җитәкчелегендә экскурсия үткәрелде. Ул студентларга китапханәнең тарихы һәм бинаның бизәлешендә кулланылган архитектура стильләре турында мавыктыргыч итеп сөйләде.

Очрашу җылы һәм дустанә мөнәсәбәттә үтте. Китапханә җитәкчелегенә, татар әдәбияты һәм туган якны өйрәнү бүлеге хезмәткәрләренә колледжның туризм факультеты мөгаллимәсе Д.З.Зиннурова олы рәхмәтен белдерде.