Татарстан Милли китапханәсенә шагыйрь Хәсән Туфанга бәйле фоторәсемнәр кабул ителде
.jpg)
2020 елның 12 мартында Татарстан Республикасы Милли китапханәсенең кулъязмалар һәм сирәк китаплар бүлегенә ветеран журналист, җәмәгать эшлеклесе, Татарстанның атказанган мәдәният хезмәткәре Роза Туфитуллова килде.
Ул Милли китапханәгә мәшһүр татар шагыйре Хәсән Туфанның тормышы һәм иҗади эшчәнлеге белән бәйле фоторәсемнәр тапшырды. 1930 – 2000 нче елларга караган әлеге кыйммәтле ядкәрләрне Роза ханым моңарчы үзенең шәхси архивында саклаган. Алар арасында Хәсән Туфанның күренекле әдипләр Максим Горький, Муса Җәлил, Кави Нәҗми, Гомәр Бәширов белән, шулай ук үз туганнары белән төшкән фотолар бар.
Роза Рәхмәтулла кызы Хәсән Туфан туганнары тарафыннан Татарстан Республикасы Милли китапханәсенә элегрәк тапшырылган кайбер кулъязма һәм фотодокументларның язылу һәм төшерелү елларын, фотоларда төшкән кешеләрдән бер өлешенең кемнәр булуын ачыкларга да ярдәм итте.
