Сәламәтлекнең кадерен белегез!

Сәламәт яшәү рәвеше – заман таләбе. Шушы уңайдан, 2020 елның 14 мартында Татарстан Республикасы Милли китапханәсенең вакытлы матбугат бүлеге хезмәткәрләре Казан шәһәренең татарча белем бирүче 15 нче номерлы гимназиясендә 5 нче сыйныф укучылары белән очрашуда булып кайтты.

Очрашу барышында китапханәчеләр укучыларга сәламәт туклану, хәрәкәтнең файдасы, авыруларны кисәтү чарасы буларак массаж хакында, стрессларга ничек каршы тору һәм озак яшәү серләре турында сөйләде. Балалар вакытлы матбугат бүлеге фондларында сакланучы газета һәм журналлар белән таныштылар, викторина сорауларына җавап бирделәр.

Соңыннан китапханәчеләр балаларга һәрвакыт күтәренке кәеф, рух ныклыгы теләде.