Зур экраннарга чыккан китаплар

2020 елның март аенда Татарстан Республикасы Милли китапханәсенең чит телләрдәге әдәбият бүлегендә (Казан, К.Маркс ур., 36 йорт) «Фильмнарга күчкән танылган китаплар» дип исемләнгән китап күргәзмәсе уза.

Бу күргәзмәдә төрек, алман, француз, америка, инглиз һәм швед язучыларының халыкка әдәби әсәр буларак кына түгел, ә һәркем яратып караган фильмнар буларак та таныш иҗат әсәрләре тәкъдим ителә. Күргәзмәдәге китапларның күбесе әсәрнең беренче язылган телендә бирелгән.

Берәр нинди әдәби әсәргә таянып төшерелгән фильмны караганнан соң, ул фильмның сюжетына нигез булган романны да укып, әсәрнең зур экрандагы куелышы белән китапны чагыштырып карау, яки киресенчә, китапны укып чыкканнан соң, аның киномотографиядә күрсәтелгән варианты белән чагыштыру һәрвакыт кызык һәм мавыктыргыч була. Әсәрне әле тагын үз оригиналь телендә дә укысаң, бу бөтенләй бәя биреп бетергесез кыйммәткә ия!

Әлеге китап күргәзмәсе белән танышып китәргә теләүчеләрне март ае дәвамында китапханәдә көтәбез.