Һәр чорның үз җыры

2020 елның 17 мартында Татарстан Республикасы Фәннәр академиясе бинасының Кече залында (Казан шәһәре, Бауман урамы, 20 йорт) «Рәшит Ваһапов фестивале һәм татар җыр сәнгате: тарих баскычлары, бүгенге торышы һәм үсеш юллары» дигән Халыкара фәнни-гамәли конференция булып узды. Анда татар җыр сәнгатенең, милли эстрадабызның тарихы һәм бүгенге проблемалары турында галимнәр, артистлар, продюсерлар, аспирантлар, студентлар фикер алышты. Конференция программасына 29 чыгыш кертелгән иде.

Әлеге Халыкара конференцияне үткәрүдә Татарстан Республикасы Милли китапханәсе дә үзеннән өлеш кертте. Татарстан Фәннәр академиясе бинасының фойесында Милли китапханәнең татар әдәбияты һәм туган якны өйрәнү бүлеге хезмәткәрләре татар җыр сәнгатенә багышланган «Һәр чорның үз җыры» дигән тематик күргәзмә куйды. Биредә җыр сәнгате тарихына багышланган, китапханә фондларында сакланучы күпсанлы китаплар, хезмәтләр һәм мәкаләләр тәкъдим ителде. Татар әдәбияты һәм туган якны өйрәнү бүлеге хезмәткәрләре чарада катнашкан кунакларны күргәзмәгә куелган басмалар белән таныштырды.