«Әнвәр Бакиров» электрон белешмәлеге

Татарстан Республикасы Милли китапханәсе сайтында «Әнвәр Бакиров» электрон белешмәлеге дөнья күрде. Ул Татарстан Республикасының һәм Россиянең атказанган сәнгать эшлеклесе,  Татарстанның халык артисты, Татарстан Республикасының Г. Тукай исемендәге Дәүләт бүләге иясе Әнвәр Закир улы Бакировның тууына 100 ел тулуны истә тотып төзелде.

Әнвәр Бакиров – татар профессиональ музыкасына нигез салучы композиторларның берсе. Ул 50 елдан артыграк гомерен музыка сәнгатенә багышлый. Ә. Бакировның мөстәкыйль иҗат юлы 1937 елда язылган «Иртәнге серенада» җырыннан башлана. Бу җыр аның иң популяр әсәрләренең берсенә әйләнә. Композиторның иҗаты жанр байлыгы белән аерылып тора. Ул – 2 балет, музыкаль комедияләр, «Тукай» операсы, симфоник, хор әсәрләре, камера-инструменталь музыкасы һәм 200 дән артык җыр авторы.

Электрон белешмәлектә композиторның тәрҗемәи хәле, аның тормышын һәм иҗатын яктырткан мәкаләләр, композиторның әсәрләре, видеоязмалар, фотоархив урын алды. Биредә күренекле композиторның әсәрләренең аудиоязмаларын, ноталарын табарга була. «Библиография» бүлеге Ә. Бакиров әсәрләре тупланган җыентыклар, аның турында аерым басмаларда, җыентыкларда, вакытлы матбугат битләрендә дөнья күргән мәкаләләр исемлеген үз эченә алды. Шулай ук Интернетта Ә. Бакировка багышланган сайтларга сылтамалар да китерелде.
Белешмәлек татар һәм рус телләрендә төзелде.