Казан – Россиянең спорт башкаласы
ТР Милли китапханәсе сайтында интернет-ресурсларга нигезләнеп төзелгән «Казан – Россиянең спорт башкаласы» дигән яңа юлкүрсәткеч дөнья күрде. Ул ТАССР ның 100 еллык юбилеена һәм Казанда тарихта беренче тапкыр Бәйсез дәүләтләр бердәмлеге (БДБ) илләренең спорт уеннары уздырылуга багышланды.
Спортны үстерү ягыннан Казан – Россиядә иң алдынгы шәһәрләрнең берсе. Спорт төрләрендәге җиңүләр саны буенча да ул лидерлар арасында. Татарстан башкаласы үзендә бер үк вакытта тарихи традицияләр белән заманчалыкны да, эре шәһәрләрдәге уңайлылык белән кунакчыллык мохитен дә берләштерә.
Даими рәвештә үткәрелүче зур спорт чараларын Казанның иң зур казанышларының берсе дип санарга кирәктер. Монументаль һәм заманча спорт корылмалары саны буенча да Татарстан башкаласына Россиядә тиңнәр юк.
Әлеге юлкүрсәткечтә спорттагы казанышлар, спорт оешмалары, спорт корылмалары һәм объектлары хакында белешмә мәгълүмат тәкъдим ителә. Шулай ук ул Казандагы спорт һәм, гомумән, Татарстан спорты турындагы мәгълүмат чыганакларын, видеоматериалларны, ТР Милли китапханәсе фондларындагы бу темага кагылышлы басма чыганакларны һ.б. эченә ала.
