Габдулла Тукай – татар әдәбияты күгендә иң якты йолдыз
2020 елның 26 апрелендә Габдулла Тукайның тууына 134 ел тула. Шушы уңайдан Татарстан Республикасы Милли китапханәсенең татар әдәбияты һәм туган якны өйрәнү бүлеге хезмәткәрләре «Габдулла Тукай – татар әдәбияты күгендә иң якты йолдыз» дип исемләнгән виртуаль күргәзмә әзерләде.
Шагыйрьнең «раушан көзгесе»дәй иҗаты, тутыкмыйча һәм тоныкланмыйча үз әһәмиятен һәм матурлыгын саклап, заман белән бергә яши. Ул гомеренең сигез елга якын вакыты эчендә 6-7 газета-журнал белән тыгыз хезмәттәшлек иткән. Үз халкының тормышын чагылдырган үлемсез әсәрләр язган, мәктәпләр өчен дәреслекләр төзегән, халык иҗаты буенча ифрат күп мәгълүмат калдырган.
Татар халкы үзенең сөекле улын, бөек шагыйрен данлап музейлар ача, мәһабәт һәйкәлләр куя, төрле бәйрәмнәр һәм мәдәни чаралар уздыра, исемен җырларга куша, китапларын бастыра һәм аларны киң җәмәгатьчелеккә тәкъдим итә.
Әлеге виртуаль күргәзмәнең дә төп максаты – Габдулла Тукай иҗаты белән кызыксынучылар өчен, Милли китапханә фондларында сакланган китапларны кулланып, шагыйрь шәхесе, аның иҗаты һәм хәзерге көндә Тукайның сәнгатьтә чагылышы турында тагын да тулырак, файдалануга уңайлы мәгълүмат булдыру.
Рәхим итеп карагыз!