Пётр Максимилианович Дульский – Казан сәнгать белеменә нигез салучы

ТАССР оешуның 100 еллыгын билгеләп үтү уңаеннан игътибарыгызга галим, музей эше һәм сәнгать белгече, этнограф, мөгаллим, журналист, нашир, полиграфист һәм рәссам Пётр Максимилианович Дульскийның Татарстан Республикасы Милли китапханәсе фондларында сакланучы китаплары белән танышырга тәкъдим итәбез.

ТАССРның атказанган сәнгать эшлеклесе Пётр Дульский – ХХ гасырның беренче яртысында Казан сәнгать мәктәбенең иң күренекле вәкилләреннән берсе; Казан губернасы һәм Совет Татарстанының сәнгать һәм архитектура тарихы буенча күпсанлы хезмәтләр язып, Татарстан сәнгать белеменә нигез салган һәрьяклы талант иясе.

Ул, республикада китап бастыру эше үсешенә дә үзеннән бәяләп бетергесез зур өлеш кертеп, хаклы рәвештә, китапчылык һәм матбагачылык юнәлешендә күренекле вәкилләрнең берсе булып санала.

Казанның совет чоры сәнгать белгече П.Е.Корнилов әйткәнчә, аның иң зур казанышы – «яшьләрне сәнгатьне яратырга һәм аңа хезмәт итәргә өйрәтте».

Татарстан Республикасы Милли китапханәсе фондларында атаклы якташыбыз Пётр Дульскийның китаплары кадерләп саклана һәм алар белән Татарстан Республикасы милли электрон китапханәсенә кереп тә таныша аласыз.