«Бөек Ватан сугышының бөек бәрелешләре»: Бөек Җиңүнең 75 еллыгына багышланган виртуаль күргәзмә

Бөек Җиңүнең 75 еллыгына багышлап, Татарстан Республикасы Милли китапханәсенең мәгълүмат-библиография бүлеге «Бөек Ватан сугышының бөек бәрелешләре» дигән виртуаль күргәзмә әзерләде.

Мәгълүм булганча, РФ Президенты Владимир Путин Указы нигезендә, 2020 ел Россиядә Хәтер һәм Дан елы дип кабул ителде. Аның максаты – тарихи хәтерне саклау һәм Бөек Ватан сугышында җиңүнең 75 еллыгын киң колачлап бәйрәм итү.

Бөек Ватан сугышы тарихында сугышның барышына, каршы торучы көчләрнең һөҗүм тактикасына зур йогынты ясаган һәм хәлиткеч борылышларга китергән бәрелешләр аерым урын алып тора. Икенче Бөтендөнья сугышы тарихында иң эре бәрелешләрнең берсе булган һәм сан ягыннан зур өстенлеккә ия булган Гитлер Германиясе гаскәрләренең хурлыклы җиңелүе белән тәмамланган 1941-1942 еллардагы Мәскәү өчен сугышлар, Бөек Ватан сугышы, гомумән, Икенче Бөтендөнья сугышы барышына хәлиткеч борылыш ясаган 1942-1943 еллардагы Сталинград өчен бәрелешләр, стратегик инициативаның тулысы белән совет командованиесе кулына күчүенә китергән 1943 елдагы Курский дугасындагы бәрелешләр әнә шундыйлардан.

Белешмә басмалардан торган виртуаль күргәзмәдә Бөек Җиңүнең хәлиткеч бәрелешләренә аерым бер бүлек багышланган. Күргәзмә барлыгы «Зур сынаулар алып килгән еллар», «Бөек Җиңүнең бөек бәрелешләре» һәм «Бөек Ватан сугышы каһарманнары. Онытылмас батырлык» дигән 3 бүлекне берләштерә.