Матурлык, мода hәм зәвык турында

ТР Милли китапханәсенең күргәзмәләр һәм мәдәни программалар бүлеге (Казан, Кремль ур., 33 йорт) гүзәл затларыбызга – хатын-кызларга багышланган «Матурлык, мода һәм яхшы зәвык турында» дип аталган виртуаль күргәзмә тәкьдим итә.

 Мода ул – җәмгыятьнең көзгесе, чагылышы. Ул тормышның барлык өлкәләренә – сынлы сәнгать, әдәбият, техникага – йогынты ясый. Хәзерге вакытта мода үзенең үсеш тарихы булган тулы бер фән. Без моның турында тулы хокук белән әйтә алабыз. Дөньякүләм танылган кутюрье һәм матурлык өлкәсен формалаштыручылар, костюм тарихы, мода үсеше турында китаплар күпләргә кызыклы булачак. Алар ничек үз стилеңне модага яраклаштыру, гәүдәң үзенчәлекләрен исәпкә алып кием сайлау серләренә төшендерәләр. Үз куллары белән гүзәллек тудырырга омтылучылар өчен тегү һәм бәйләүгә өйрәтүче журналлар тәкьдим ителә.

Хатын-кыз матурлыгы – табигатьнең бер бүләге, ул тормышны яктырак һәм кызыклырак итә. Югары зәвык һәркемгә дә бирелми, ләкин бу сыйфатны үстерүдә белгеч киңәшләре, китаплардагы мәгьлүмалар ярдәмгә килә. Алар ничә яшьтә булуыңа карамастан, һәрвакыт сәламәт, шат күңелле, зәвыклы булырга өйрәтә. Әлеге күргәзмә белән танышып, сез үзегез өчен күп яңа мәгьлүмат алачаксыз, кызыклы ачышлар ясаячаксыз.

Күргәзмә белән http://kitaphane.tatarstan.ru/rus/virt_v.htm сылтамасы белән күчеп таныша аласыз.