«Батырлар утларга керделәр, тик исән булсын, дип, Ватаным»

Җиңүнең 75 еллыгы уңае белән Татарстан Республикасы Милли китапханәсенең татар әдәбияты һәм туган якны өйрәнү бүлеге, Бөек Ватан сугышында катнашкан татар язучыларына багышлап, «Батырлар утларга керделәр, тик исән булсын, дип, Ватаным» дигән виртуаль күргәзмә әзерләде.

Татар халкының уллары һәм кызлары Бөек Ватан сугышының бөтен хәлиткеч яуларында катнашкан. Сугышның беренче көннәреннән үк татар язучылары да, кулына корал алып, Ватанны саклау өчен дошманга каршы көрәшкә күтәрелгән. Татарстан Язучылар берлегенә кергән 53 язучының 25-е фронтка киткән: Муса Җәлил, Фатих Кәрим, Абдулла Алиш, Гадел Кутуй, Xәйретдин Мөҗәй, Нур Баян, Сибгат Хәким, Нәби Дәүли һәм башкалар. Алар алгы сызыкта батырларча сугышканнар, фронт газеталарында әдәби хезмәткәрләр булып эшләгәннәр. Сугыш туктап торган арада актуаль темаларга язылган матур әсәрләре белән татар әдәбияты хәзинәсен баетканнар.

Аларның күбесенә кире әйләнеп кайтырга насыйп булмый. Республиканың 30 язучысы Ватан бәйсезлеге өчен үз гомерен бирә. Дошман белән канлы сугышларда М.Әблиев, А.Аитов, А.Алиш, М.Әхмәтгалиев, К.Басыйров, Н.Баян, М.Вәдүт, Ш.Гәрәй, М.Гаязов, Р.Ильяс, Х.Кавиев, А.Камал, Ф.Кәрим, Г.Кутуй, В.Мифтах, Х.Мөҗәй, М.Мостафин, Г.Нигъмәти, Х.Рахман, Р.Саттар, Д.Фәтхи һәм башкалар һәлак була.

Тылда калган язучылар да халык арасында актив идеологик эш белән шөгыльләнә: әдәби кичәләр оештыралар, газета-журналларда эшлиләр, радиодан чыгышлар ясыйлар. Әдәбият эшен дә калдырмыйлар – патриотик рухтагы әсәрләр иҗат итәләр.

Күргәзмәнең төп максаты – татар язучыларының сугышта күрсәткән батырлыкларын мәңгеләштерү, тыныч күк йөзебез өчен башларын салучыларның исемнәрен хәтердә саклау һәм киләчәк буыннарга җиткерү.

Рәхим итеп карагыз!