Славян язуы һәм Рус теле көненә багышланган виртуаль күргәзмә

24 майда киң җәмәгатьчелек Славян язуы һәм мәдәнияте көнен, ә 6 июньдә − Рус теле көнен билгеләп үтә. Татарстан Республикасы Милли китапханәсенең  мәгълүмат-библиография бүлеге әлеге мөһим даталарга багышлап «Тел – цивилизация һәм мәдәният юлы: МББ фондындагы аңлатмалы сүзлекләр» дигән берләштерелгән виртуаль күргәзмә әзерләде.

Мәгълүм булганча, Россиядә Славян язуы һәм мәдәнияте көннәре РСФСР Югары Советы Президиумы карары нигезендә 1991елдан билгеләп үтелә.  Әлеге датага багышланган чараларны дәүләт һәм иҗтимагый оешмалар һәр ел Рус православие чиркәве белән берлектә оештыра.

Заманча рус теленә нигез салучы бөек шагыйрь А.С.Пушкинның туган көнендә билгеләп үтелүче Рус теле көне күптеллелек һәм мәдәниятләр төрлелегенә ярдәм итү һәм аны үстерү буенча Берләшкән милләтләр оешмасы (БМО) программасы нигезендә 2010 елда гамәлгә куела. Аның максаты − БМО ның рәсми алты эш теленең берсе булган рус теленең тарихы, мәдәнияте һәм үсеше турында хәбәрдарлыкны арттыру. Россиядә әлеге бәйрәм 2011 елдан билгеләп үтелә.

ТР Милли китапханәсе  мәгълүмат-библиография бүлегенең әлеге даталарга багышлап әзерләгән виртуаль күргәзмәдә бүлек фондындагы аңлатмалы сүзлекләр, энциклопедияләр, белешмәлекләр урын алган. Күргәзмә киң катлам укучыга исәпләнгән.