Гаилә – җылы учак
Татарстан Республикасы Милли китапханәсенең вакытлы матбугат бүлеге, ел саен 8 июльдә билгеләп үтелә торган Бөтенроссия гаилә, мәхәббәт һәм тугрылык көненә багышлап, «Гаилә – җылы учак» дигән виртуаль күргәзмә тәкъдим итә.
Гаилә, мәхәббәт һәм тугрылык турында шагыйрьләр тарафыннан инде күптән матур сүзләр әйтелгән кебек тоелса да, алар беркайчан да артык түгел, чөнки һәрчак яңача һәм тирән мәгънә белән яңгырыйлар.
Никах күкләрдә укыла, диләр. Җирдә ул теркәлә. Яратышып, балдаклар алмашып гаилә корган егет һәм кыз шатлыкта да, кайгыда да, байлыкта да, авырлыкларда да җитәкләшкән кулларын ычкындырмаска тиешләр. Гаилә бәхете җиңел генә бирелми – аңа ирешү өчен күп көч түгәргә кирәк.
Күргәзмәдә гаилә темасына зур урын бирүче периодик басмалар, Татарстанның матур гаиләләрен үрнәк итеп күрсәтүче газета-журнал мәкаләләре , гаиләдәге социаль мәсьәләләрне хәл итү, балаларны тәрбияләү буенча психологлар һәм педагоглар киңәшләре, гыйбрәтле сабаклар тәкъдим ителде.