Китапханә эше өлкәсендәге республика конкурсларына нәтиҗә ясалды
Татарстан Республикасы Мәдәният министрлыгының китапханә эше өлкәсендәге «Әйдәп баручы» һәм «Иҗади эзләнү» премияләрен бирү буенча республика конкурсларына йомгак ясалды.
2020 елның 21 июлендә Оештыру комитеты утырышы булды, аңа Татарстан Республикасы Мәдәният министрлыгы, шулай ук республиканың барлык эре китапханәләре: Татарстан Республикасы Милли китапханәсе, Республика Яшүсмерләр китапханәсе, Республика Балалар китапханәсе, Сукырлар һәм начар күрүчеләр өчен Республика махсус китапханәсе вәкилләре керде. Премия ияләрен билгеләү, аларны бирү эшен төп оештыручы – Татарстан Республикасы Милли китапханәсе.
Ике премия дә китапханә хезмәткәрләренең иҗади һәм инновацион активлыгын үстерүгә, аларның һөнәри эшчәнлеген стимуллаштыруга, республикадагы китапханә эшенең иң яхшы традицияләрен саклап калуга һәм үстерүгә юнәлдерелгән. «Лидер» премиясе календарь ел нәтиҗәләре буенча Татарстан үзәкләштерелгән китапханә системаларының (ҮКС) берсенә җәмгыять ихтыяҗларына җавап бирерлек заманча китапханә өлгесен булдырырга тырышкан, халыкка нәтиҗәле һәм сыйфатлы китапханә хезмәте күрсәткән, китапханә хезмәтләрен камилләштергән һәм уңайлы иткән, халык арасында китапханәләрнең социаль статусын күтәргән өчен бирелә. «Иҗади эзләнү» премияләре китапханәләр эшчәнлегендә яңача һәм аеруча отышлы эш алымнары кулланган өчен «Үзәк китапханә», «Шәһәр китапханәсе», «Авыл китапханәсе» номинацияләрендә тапшырыла.
2019 ел нәтиҗәләре буенча Оештыру комитетына 28 гариза (3-се – «Лидер» премиясенә, 25-е – «Иҗади эзләнү» премиясенә) керде.
«Лидер» премиясе Татарстан Республикасы Арча муниципаль районының «Арча үзәкләштерелгән китапханәләр системасы» муниципаль бюджет учреждениесенә китапханә эшчәнлеген интенсив үстергәне, инновацион эш формаларын керткәне, китапханәләрнең матди-техник базасын яңартканы, милли мәдәниятне үстерү һәм саклау буенча актив эшчәнлек алып барганы өчен бирелде.
«Иҗади эзләнү» премиясе лауреатлары:
«Үзәк китапханә» номинациясендә – «Казан шәһәре үзәкләштерелгән китапханәләр системасы» муниципаль бюджет учреждениесенең Үзәк китапханәсе «Әйдә китапханәгә!» дигән пиар-проектны эшләгәне һәм тормышка ашырганы өчен;
«Шәһәр китапханәсе» номинациясендә – «Түбән Кама шәһәре ҮКСы» муниципаль бюджет учреждениесенең 6 нчы филиалы – Шәһәр балалар китапханәсе балаларны үстерү һәм тәрбияләү юнәлешендәге «Шатлыклы мозаика», «Фантазёрлар», «Акыллылар мәктәбе», «Мавыгулар дөньясы», хобби-остаханә проектлары өчен.
«Авыл китапханәсе» номинациясендә – «Балтач җирлекара Үзәк китапханәсе» муниципаль бюджет мәдәният учреждениесенең 8 нче филиалы – Югары Субаш авыл китапханәсе китап укучыларны җәлеп итүгә корылган «Укып, уйлап яшибез» дигән проектны булдырганы һәм гамәлгә ашырганы өчен.
Яңача (инновацион) эшчәнлекне үстергәннәре өчен Оештыру комитеты карары белән Рәхмәт хатларына ия булучы китапханәләр:
Татарстан Республикасы Бөгелмә муниципаль районының «Җирлекара Үзәк китапханә» муниципаль бюджет мәдәният учреждениесенең Үзәк китапханәсе;
«Әгерҗе үзәкләштерелгән китапханәләр системасы» муниципаль бюджет учреждениесенең 17 нче филиалы – Кырынды авылы китапханәсе.
Җиңүчеләрне котлыйбыз һәм киләчәктә дә һөнәри уңышлар телибез!