Мәскәүдәге Татарстан Республикасы мәдәнияте көннәрендә катнашу
12–18 август көннәрендә Россия башкаласында Татарстан Республикасы мәдәнияте көннәре узды. 18 августта Мәскәү халыкара Музыка йортында үткәрелгән бәйрәм чарасында Татарстан Республикасы Милли китапханәсенең сирәк китаплар һәм кулъязмалар бүлеге ТАССР төзелүнең 100 еллыгына багышланган китап күргәзмәсе тәкъдим итте.
Музыка йортының концертлар залына җыелган тамашачылар алдында сәламләү сүзләре белән Россия Федерациясе Хөкүмәте рәисе урынбасары Марат Хөснуллин, Россия Федерациясе башкаласы мэры Сергей Собянин һәм Татарстан Республикасы Президенты Рөстәм Миңнеханов чыгыш ясады.
Күргәзмәдә Мәскәүдә яшәүче милләттәшләребез игътибарына, революциягә кадәр нәшер ителгән басмалар белән беррәттән, татар совет әдипләренең 1920–1929 елларда гарәп графикасында басылган китаплары тәкъдим ителде.
Китапханә хезмәткәре Алсу Гәрәева килгән кунакларны бөек шагыйрь Габдулла Тукайның «Г.Тукай мәҗмугаи асәре» (1914), «Габдулла Тукай шигырьләре» (1926), мәгърифәтче Шиһабетдин Мәрҗанинең «Китабе Мөстәфадел-әхбар фи әхвали Казан вә Болгар» (1885), Харис Фәйзи-Чистапулиның «Ысуле җәгърафия» (1905), Габделбари Батталның «Татар тарихы» (1912), Фатих Кәриминең ХХ гасыр башында язылган хикәяләрен бергә туплаган «Фатих Кәрими әсәрләре» (1925) китаплары белән таныштырды. Әлеге күргәзмәдә 1920 нче елларда әдәбият мәйданына килгән совет чоры шагыйрьләреннән Төхфәт Ченәкәйнең «Өмид очкынлары» (1918), Һади Такташның «Күмелгән кораллар» (1928), Имай Насыйриның «Карлыгачлар» (1927) китаплары да бар иде. Шулай ук Галимҗан Ибраһимовның 1921–1922 елларда Идел буенда булган коточкыч ачлыкны сурәтләгән «Адәмнәр» (1923) хикәясе куелды. Татар драматургларыннан Галиәсгар Камалның «Декламацияләр» (1921), Гафур Коләхмәтовның яңа заман рухында язылган «Ике фикер», «Яшь гомер» пьесаларын үз эченә алган мәҗмугасе (1925); балалар өчен язылганнардан Г.Тукайның «Алтын әтәч» (1909), «Балыкчы Камил» (1927), Һ.Такташның «Караборынның дусты» (1927) дип аталган төсле бизәлешле, матур рәсемле китаплары бәйрәм тантанасында катнашучылар игътибарына тәкъдим ителде.
Милләттәшләребез, бәйрәм кунаклары кызыклы һәм бай мәгълүматлы күргәзмә оештырганнары өчен Милли китапханәгә зур рәхмәтләрен җиткерделәр.
