1 сентябрь – Белем көне

Татарстан Республикасы Милли китапханәсенең мәгълүмат-библиография бүлеге Белем көненә багышлап, «Өйрән! Танып бел! Гаҗәпкә кал!» дигән виртуаль күргәзмә тәкъдим итә.

Илебездә ел саен 1 сентябрьдә Белем көне билгеләп үтелә. Бу – көзнең беренче көне, Россиянең барлык мәктәпләрендә, шулай ук урта һәм югары уку йортларында яңа уку елы башланган көн.

Белем көне – барлык укучылар, студентлар, ата-аналар, укытучылар, мәктәп һәм башка белем бирү оешмалары белән бәйле барлык кешеләр өчен бәйрәм.

Бу бәйрәм совет чорында ук барлыкка килгән. Ул рәсми төстә Белем көне буларак 1984 елда СССР Югары Советы Президиумының «1 сентябрьне бөтенхалык бәйрәме – Белем көне дип игълан итү турында»гы Указы белән гамәлгә куела.

Республикабыз җитәкчелеге 1 сентябрь көнне, гадәттәгечә, укытучыларны һәм укучыларны Белем көне белән котлый. Төрле уку йортларына район һәм шәһәр хакимиятләре вәкилләре килә.

Күргәзмәдә китап укучылар өчен төрле тармакларга караган белешмә һәм энциклопедик басмалар тәкъдим ителгән.

Рәхим итеп, карагыз!