«Өлкән яшьтәгеләрнең сәламәтлеге, яшәү рәвеше һәм озын гомерлелеге»
Татарстан Республикасы Милли китапханәсенең файдаланучыларга хезмәт күрсәтү бүлеге «Өлкән яшьтәгеләрнең сәламәтлеге, яшәү рәвеше һәм озын гомерлелеге» дип аталган виртуаль күргәзмә белән танышырга тәкъдим итә. Ул Халыкара өлкәннәр көненә багышланган.
Өлкәннәр көне 1 октябрьдә билгеләп үтелә: бу көн халыкара статуска ия. Өлкән кешеләр – җәмгыятебезнең терәге. Алар – яшьләр өчен үрнәк, гореф-гадәтләрне саклаучылар, тормыш тәҗрибәләре белән бүлешүче остазлар. Шул ук вакытта алар – иң йомшак күңелле, тормыш җилләренә тиз бирешүчеләр.
Халыкара өлкәннәр көне игътибарыбызны өлкән яшьтәге кешеләрнең җәмгыять тормышындагы урынына юнәлтергә, олыгаюның уңай яклары һәм проблемалары турында хәбәрдар булырга, әби-бабайларга миһербанлы, шәфкатьле мөнәсәбәт күрсәтергә өнди.
Виртуаль күргәзмәне караудан канәгатьлек алуыгызны телибез.