Халыкара өлкәннәр көне

1 октябрьдә билгеләп үтелүче Халыкара өлкәннәр көне – ата-аналарыбызга, әби-бабайларыбызга игътибар һәм кайгыртучанлык белән сугарылган изге бәйрәм. Бу көнне оешмаларда ветераннарны хөрмәтләү күркәм традициягә әйләнде.

Татарстан Республикасы Милли китапханәсендә эшләп, пенсиягә чыккан хезмәткәрләр белән традицион очрашу да 1 октябрь көнне узды.

Безнең ветераннар Милли китапханәнең Пушкин урамындагы 86 нчы йортта урнашкан яңа бинасына чакырулы иделәр. Биредә аларны китапханә җитәкчелеге һәм профсоюз оешмасы вәкилләре җылы котлады. Яңа бина буйлап экскурсия оештырылды, соңыннан мөхтәрәм кунаклар чәй өстәленә янына утырып, сый-нигъмәттән авыз итте.

Очрашу вакытында өлкәннәр китапханәнең бүгенге эшчәнлеге белән кызыксынды, хезмәттәшләре белән сөйләште, үзләре эшләгән чорларны искә төшерде, алмашка килгән яшьләр белән аралашты.