«Мәдәният» илкүләм проекты кысаларында Татарстанның Биектау районында модель китапханә ачылды

2020 елның 1 октябрендә Татарстан  Республикасы Биектау муниципаль  районында яңартылган Чернышевка  авыл китапханәсе үз ишекләрен  ачты. Китапханәне модернизацияләү «Мәдәният» илкүләм проекты кысаларында башкарылды.

Ачылыш Татарстан Республикасы мәдәният министры урынбасары Ленар Хәкимҗанов һәм Татарстан Республикасы Милли китапханәсе директоры Мәдинә Тимерҗанова катнашында узды.

Федераль бюджеттан 5 млн. сум күләмендә алынган акча ярдәмендә Чернышевка авыл китапханәсе югары тизлекле Интернет, заманча компьютер техникасы белән җиһазландырылган, заманча мәгълүмати ресурсларга, вакытлы матбугатның цифрлы коллекцияләренә һ.б. ия булган интеллектуаль үзәккә әверелде.

Заманча һәм уңайлы мәйданнарда дискуссия клублары, консультация пунктлары һәм төрле яшьтәге төркемнәр өчен лекторийлар эшли башлаячак. Мөмкинлекләре чикләнгән кешеләр өчен керү юлында пандус һәм халыкның аз хәрәкәтләнүче төркемнәре өчен махсус бокс-тартмалар урнаштырылган, буккроссинг (китап алмашу) киштәсе барлыкка килгән. Китапханә фонды 2 меңнән артык яңа китапка баеган һәм алар ачык киштәләрдә урнашачак. Китапханә хезмәткәрләре балалар һәм яшүсмерләр белән эшләүдә кызыклы алымнар кулланып төрле чаралар: иҗади ринглар, әдәби караоке һәм лекция-перфоманслар үткәрә алачак.

Чернышевка авылы китапханәсен яңарту – республикада быел өченче шундый күркәм вакыйга. Моңа кадәр модель китапханәләр Татарстанның Спас һәм Арча муниципаль районнарында ачылды.