«Хәтердә саклар өчен...»
Татарстан Республикасы Милли китапханәсе фондлары Бөек Ватан сугышында Җиңүнең 75 еллыгына багышланган «Хәтердә саклар өчен...» («Чтобы помнили...») дигән китап белән тулыланды. Әлеге китап – «Өмет» балалар әдәбиятын яклау һәм үстерү фондының уникаль халыкара проекты. Ул Россия, Беларусь, Украина, Азәрбәйҗан, Латвия, Германия, Израиль һәм Испаниянең балалар һәм өлкәннәр өчен иҗат итүче фронтовик-язучыларын, яңа буын язучыларын берләштергән. Җыентыкның 42 авторы һәм тәрҗемәчеләре арасында татар әдәбияты вәкилләре дә лаеклы урын алган.
Әлеге проектның авторы һәм җитәкчесе – Балалар әдәбиятын яклау һәм үстерү хәйрия фонды президенты, балалар язучысы, шагыйрә, Россия Язучылар берлеге әгъзасы Надежда Кузнецова. Ул билгеләп үткәнчә, Татарстан беренчеләрдән булып проект кысаларында хезмәттәшлекне хуплаган.
2020 елның 1 октябрендә Татарстан Республикасы Язучылар берлегенең Габдулла Тукай клубында узган китапны тәкъдир итү кичәсендә Надежда Кузнецова: «Мондый җыентыкны булдыру идеясе Мәскәүдә режиссёр Михаил Комлевның хәрби-патриотик фильмын карагач туды. Мин үз алдыма тынычлыкның нинди юл белән яулап алынуын балаларга җиткерү бурычын куйдым», – диде. Җыентыкның авторлары китапларның бер өлешен Татарстан Республикасы китапханәләренә бүләк иттеләр.
Истәлекле җыентык «Татмедиа» АҖ филиалы «Идел-Пресс» полиграфия-нәшрият комплексында басылды. Рәсемле матур китап мәктәп укучылары өчен сугыш һәм тынычлык, халык батырлыгы һәм хәтере турындагы шигырьләрдән һәм хикәяләрдән гыйбарәт. Проектның координаторы, Россия Язучылар берлегенең балалар әдәбияты комиссиясе рәисе Вера Хәмидуллина фикеренчә: «Бу җыентык – ватанпәрвәрлек тәрбияләүнең иң яхшы чарасы. Ул, һичшиксез, яшь буын китап укучыларга барып ирешергә тиеш».
