«Ватаным Татарстан» газетасын чыгаручылар белән очрашу

2013 нче елның 15 нче февралендә Татарстан Республикасы Милли китапханәсенең икенче бинасындагы уку залында (Казан, К.Маркс ур., 36 нчы йорт) Казан федераль университетының журналистика факультеты I-III нче курс студентлары «Ватаным Татарстан» газетасы редакциясе хезмәткәрләре белән очраштылар. Очрашуны китапханәнең вакытлы матбугат бүлеге газета чыга башлауга 95 ел тулу уңаеннан оештырды.

Редакция журналистлары белән берлектә баш мөхәррир Миңназыйм Сәфәровның да килүе очрашуның әһәмиятен тагын да арттырды.

Вакытлы матбугат бүлеге хезмәткәрләре «Ватаным Татарстан» – 95» дигән темага ретроспектив күргәзмә оештырдылар. Анда республикабызның үткәне, хәзергесе, киләчәге турында сөйләүче газета сәхифәләре тупланган иде.

Әйдәп баручы китапханәче Надия Садыйкова газетада төрле елларда чыккан кызыклы мәкаләләргә аерым тукталды.

Студентлар һәм редакция хезмәткәрләре үзара бик теләп аралаштылар.