«Татарстан халыкларының мәдәни-әхлакый байлыгы»

2013 нче елның 16 нчы февралендә Казан шәһәренең Идел буе районы 40 нчы номерлы мәктәбендә Казан мәктәпләре укучыларының фәнни-гамәли конференциясе узды. Әлеге конференция күренекле җәмәгать эшлеклесе, татар тарихчысы һәм педагогы Һади Атласига багышланып, «Татарстан халыкларының мәдәни-әхлакый байлыгы» дип аталган иде.

Конференциядә катнашучыларның фәнни эшләрен бәяләүче жюри эшендә Татарстан Республикасы Милли китапханәсе хезмәткәрләре – вакытлы матбугат бүлегенең газеталар секторы мөдире Г.Н.Закирова белән татар әдәбияты һәм туган якны өйрәнү бүлеге мөдире Г.Ш.Җомаголова да катнашты.

Конференция эше төрле секцияләргә бүленеп узды. Безнең китапханә хезмәткәрләре «Татарстан Республикасы халыкларының этник мәдәнияте» секциясендә тыңланган эшләрне бәяләделәр.

2013 ел Татарстанда экологик культура һәм тирә-як мохитне саклау елы буларак, бу конференция җәмәгатьчелекнең игътибарын нәкъ менә шушы мәсьәләләргә юнәлтте.