Сындырылган язмышлар

Татарстан Республикасы Милли китапханәсенең кулъязмалар һәм сирәк китаплар бүлеге «Сындырылган язмышлар» исемле виртуаль күргәзмә тәкъдим итә. Күргәзмә репрессия корбаннары булган татар әдипләренең якты истәлегенә багышлана. Ул ел саен Россиядә 30 октябрьдә үткәрелә торган Сәяси репрессия корбаннарын искә алу көне уңаеннан әзерләнде.

Күргәзмәдә Ватанга хыянәттә гаепләнеп, нахакка хөкем ителгән язучыларның фоторәсемнәре, кыскача тәрҗемәи хәлләре, китапларының тышлык сурәтләре куелган. Галимҗан Ибраһимов, Фәхрелислам Агиев, Әхмәдһади Максуди, Кәрим Тинчурин, Фатих Кәрими, Шәһәр Шәрәф, Борһан Шәрәф – татар әдәбияты, мәдәнияте, мәгърифәте, тарихы үсешенә зур өлеш керткән шәхесләр. Кулъязмалар һәм сирәк китаплар бүлегендә бу мәгърифәтчеләрнең бәһасез китаплары, алар нәшер иткән һәм мәкаләләре даими рәвештә басылып чыккан газета-журналлар саклана.

Зыялы шәхесләребезнең «халык дошманы» тамгасы сугылып юк ителүе, үлем хөкеменә тартылуы – татар халкы өчен зур югалту. Тарихи дөреслек торгызылып, нахакка гаепләнгән язучыларның исемнәре һәм тарихыбыз өчен зур әһәмияткә ия булган хезмәтләре акланып, халыкка кайтарылды. Күргәзмәдә куелган 44 документта бу язучыларның тормышлары һәм иҗатлары күрсәтелгән.

Халкына хезмәт итүгә күп көч куйган, сындырылган язмышлы бу шәхесләрнең фаҗигале һәм аянычлы тормыш юлы, әмма бай һәм әһәмиятле иҗаты, эшчәнлеге татар мәдәнияте белән кызыксынучылар өчен кызыклы булыр.