«Шәһри Казан»га – 30 яшь»

Татарстан Республикасы Милли китапханәсенең вакытлы матбугат бүлеге татар телендә нәшер ителүче көндәлек иҗтимагый-сәяси һәм мәдәни  «Шәһри Казан» газетасының юбилее уңаеннан «Шәһри Казан»га–30 яшь» дип исемләнгән виртуаль күргәзмә тәкъдим итә.

Татарстанның дәүләт суверенитеты турындагы декларация кабул ителүгә ике атна вакыт кала «Шәһри Казан» газетасының беренче сигнал саны дөнья күрә. 2020 елның 17 августы көнне газета чыга башлауга 30 ел тулды.

1990 ел – илебездә зур үзгәрешләр булган ел.  Шул ук вакытта  «Шәһри Казан» газетасының чыга башлавы әлеге үзгәрешләр рәтендә балкып тарихка кереп калды. 30 яшь – әле аякка басып, җитлегеп килгән вакыт. Газета, яшь булса да, тәҗрибәле, үзенең саллы сүзен әйтә алган матбугат органы буларак билгеле. Аның битләрендә исемнәре танылган язучылар, журналистлар үзләренең мәкаләләрен бик теләп бастыра. Редакция коллективы үз эшен һәм укучысын аңлап һәм яратып эшли.

 «Шәһри Казан» газетасы заманча технологияләрне актив куллануы белән аерылып тора, татар телле басмалар арасында бу юнәлештә лидерларның берсе булып исәпләнә. Димәк, укучылар белән элемтә газета битләрендә генә түгел, социаль челтәрләрдә, Интернетта, мес-сенджерларда да алып барыла, дустанә мөнәсәбәтләр тагын да үстерелә.

 Татарстан Республикасы Милли китапханәсенең вакытлы матбугат бүлегендә  (Казан шәһәре, К.Маркс урамы, 36 йорт) «Шәһри Казан» газетасының барлык саннары саклана.

Юбиляр газетаның, яулаган үрләрендә тукталмыйча,  зур уңышларга ирешүен, кызыклы темалар ачуын, күпсанлы яңа укучылар табуын телибез.