Халыкара инвалидлар көненә карата
Татарстан Республикасы Милли китапханәсенең вакытлы матбугат бүлеге Халыкара инвалидлар көненә багышланган «Җылылык көтә җирдә һәр йөрәк» дигән виртуаль күргәзмә тәкъдим итә.
Күргәзмәгә вакытлы матбугат басмаларыннан алынган, татар һәм рус телләрендәге мәкаләләр куелды. Биредә Инвалидлар көненең барлыкка килү тарихына бәйле мәгълүмат табарга, физик җитешсезлекләре булуга карамастан, үз-үзләрен җиңеп, зур казанышларга ирешкән көчле шәхесләр турында белергә мөмкин. Мәкаләләрнең бер өлеше инвалидларның хокуклары һәм аларга тиешле ташламалар хакында сөйли.
Күргәзмә авырлыклар алдында югалып калмыйча күңелен төшермәгән, актив тормыш рәвеше белән яшәүче, спорт һәм башка чараларда катнашучы, гомумән, җәмгыятьнең сау халәттәге бик күп затларына үрнәк булырлык, әмма сәламәтлек җәһәтеннән мөмкинлекләре чикләнгән кешеләр турында кабат ныклап уйланырга мәҗбүр итә.
Шулай ук материаллар арасында мондый кешеләргә көнкүреш уңайсызлыкларын һәм башка катлаулы ситуацияләрне җиңеп чыгуда һәртөрле ярдәм күрсәтү турындагы мәкаләләр дә бар.