«Академиклар» Татарстан Республикасы Милли китапханәсе белән таныша
Идел буе спорт һәм туризм академиясендә узган «Спорт менеджменты атнасы» кысаларында студентлар-магистрантлар, укытучылар һәм вуз хезмәткәрләре 3 декабрьдә Татарстан Республикасы Милли китапханәсендә булдылар (Пушкин урамы, 86 йорт).
Чара программасына китапханәнең барлык киңлекләре буенча күзәтү экскурсиясе, мәгълүмат-библиография бүлеге һәм вакытлы матбугат бүлеге белән танышу кертелгән иде. Кунакларга китапханәнең белешмә-библиографик аппараты турында сөйләделәр, каталоглар, китапханәнең белешмә-библиографик фонды, дәүләт библиографиясе басмалары белән таныштырдылар.
Электрон ресурсларга күзәтүне мәгълүмат-библиография бүлегенең хокукый мәгълүматлар секторы мөдире Татьяна Ефимовских үткәрде. Татьяна Борисовна тарафыннан презентациядә тәкъдим ителгән мәгълүмат тыңлаучыларда зур кызыксыну уятты. Делегациянең калган катнашучылары да яңартылган китапханә белән танышу мөмкинлегеннән бик теләп файдаланды.
Татарстан Республикасы Милли китапханәсе бүген – гаять зур китап җыелмасы гына түгел, иң әүвәл – конкрет шәхескә юнәлтелгән, коворкинг функцияләре булган уңайлы югары технологияле иҗтимагый киңлек. Белгечләр ярдәменнән һәм киңәшләреннән башка китапханә ресурсларын нәтиҗәле һәм тулы күләмдә файдалану мөмкин түгел.
Шунысын да билгеләп үтәргә кирәк, «академикларның» Татарстан Республикасы Милли китапханәсенә бу визиты узып баручы елда икенче булды. Әмма яңартылган китапханә буенча ике экскурсия генә җитәрлек түгел. Яңа сәфәрләр, китапханәнең мөмкинлекләре белән танышуның яңа этаплары алда әле.
