Бакый Урманче: «Халкымның сагышы – минем дә сагышым...»

Татарстан Республикасы Милли китапханәсенең «Милли китап» нәшриятында «Бакый Урманче көндәлекләре» исемле, 218 битле китап басылып чыкты. Аны басмага текстолог, Милли китапханә хезмәткәре Раиф Мәрданов әзерләде.

Китапта мәшһүр рәссам һәм сынчы Бакый Идрис улы Урманченың 1965–1976 еллар арасында гарәп хәрефләре белән язып барган көндәлек язмалары урын алган.

Бөек останың көндәлек язмаларында милли мәдәният һәм сәнгать турындагы уйлары, сагыш һәм моң белән сугарылган фикерләре киң иҗади яшәеше белән бергә үрелгән. Бакый Урманченың «Мин халкым белән, аның сагышлары һәм бәхете белән бер тормышта яшим. Халкымның сагышы белән шатлыклары – минем дә сагышым һәм шатлыгым» дигән фикере көндәлек язмаларында тулаем раслана. Язмалар скульптура, рәсем сәнгате, дин, милләт язмышы, туган тел, тарих, әдәбият, китап, матбугат һәм нәшрият, музыка, театр, кино, телевидение, каллиграфия һәм палеография, сәламәтлек, сәфәрләр һ.б. үз эченә ала.

Бакый Урманченың моннан 40–50 еллар элеккеге язмалары хәзерге заманга аваздаш вакыйгалар тасвирлануы ягыннан кызыклы. Ул чорда Татарстан АССРның 50 еллыгы, Бөек Җиңүнең 20 еллыгы турында сүз барса, 2020 елда ТАССРның 100, ә Җиңүнең 75 еллык юбилейлары билгеләп үтелде. Ана теле язмышы, милли мәктәпләрнең бетерелүе, халык исәбен алу, сайлаулар турындагы һәм бүтән мәсьәләләрнең дә хәзерге чорда актуаль параллельләре бар.