Татарстан Республикасы Милли китапханәсенең яңартылган бинасы белән таныштыру: мәгълүмат көне

Халыкара инвалидлар көненә багышланган декада кысаларында Татарстан Республикасы Милли китапханәсенең яңартылган бинасында (Казан, Пушкин ур., 86 йорт) сәламәтлеге чикләнгән кешеләр катнашында үзенчәлекле экскурсия үтте. Аны китапханәнең күргәзмәләр һәм мәдәни программалар бүлеге белән берлектә китап укуга җәлеп итү һәм тышкы элемтәләр бүлеге оештырды. Экскурсияне махсус чакырылган кунак – «Э-моция» иҗат студиясе җитәкчесе Инесса Клюкина алып барды.

Экскурсиягә килүчеләр Милли китапханәнең әлеге бинасында сәламәтлеге чикле булганнарга уңайлы шартлар тудырылуга игътибар иттеләр. «Алар уңышка ирештеләр» дип аталган китап күргәзмәсе аерым кызыксыну уятты. Бу күргәзмәдә инклюзив, ягъни сәламәтлеге һәм зиһене җәһәтеннән төрле халәттәге балаларны гомуми белем бирү мәктәбендә бергә укыту, чикләрсез туризм, сәламәтлеге чикле булганнарның спорт казанышлары турындагы китаплар куелды. Чара ахырында теләге булганнарга китапханәгә язылу мөмкинлеге тудырылды һәм бердәм китап укучы билеты тапшырылды.

Халыкара инвалидлар көненә багышланган декада 2020 елның 1–10 декабрендә узды. Билгеле булганча, бу көн ел саен 3 декабрьдә билгеләп үтелә. Бу – инвалидлар тормышына, проблемаларына игътибар итү, аларның хокукларын, мәнфәгатьләрен яклау ихтыяҗы турында искәртү өчен тагын бер форсат.