«Заман һәм шәхес»

Шәрәфләр – татарның күренекле мәдәният һәм җәмәгать эшлеклеләре гаиләсе. Тарихта «Борадәран Шәрәфләр» («Бертуган Шәрәфләр») дип билгеле бу гаиләнең иң танылганнарының берсе – Борһан Шәрәф.

Борһан Шәрәфетдин улы Шәрәф 1883 нче елның августында Казан губернасы Тәтеш өязе (хәзерге Татарстан Республикасы Буа районы) Аксу авылында туа. Башлангыч белемне авылларында ала, Казанда «Мөхәммәдия» мәдрәсәсендә укый. 1901 нче елда «Мөхәммәдия» мәдрәсәсендә гарәп һәм фарсы телләрен укыта. 1905 нче елдан башлап «Казан мөхбире» газетасында сәркятиб, «Әхбар» газетасында мөхәррир, Оренбургта «Вакыт» газетасында эшли. Бер үк вакытта «Хөсәения» мәдрәсәсендә мөгаллимлек итә. 1917–1918 нче елларда «Оренбург мөхбире» газетасын чыгара. Оренбург миллионеры һәм меценаты Гани бай Хөсәеневнең эшчәнлеге турында 1913 елда «Гани бай» дип аталган китап язып нәшер итә.

2013 нче елның 1 нче августыннан Татарстан Республикасы Милли китапханәсенең Зур уку залында, дин һәм җәмәгать эшлеклесе, язучы, нашир һәм журналист Борһан Шәрәфетдин улы Шәрәфнең (1883–1942) тууына 130 ел тулуга багышлап, «Заман һәм шәхес» дип аталган күргәзмә куелды. Күргәзмәдә Борһан Шәрәфнең ХХ гасыр башында гарәп графикасында дөнья күргән «Гани бай» китабы белән танышырга мөмкин. Шулай ук әдипнең төрле елларда вакытлы матбугатта басылган мәкаләләре дә урын алган. Биредә, әдипнең хезмәтләре белән бергә, аның турындагы әдәбиятның да бер өлеше бар.

Күргәзмә 2013 нче елның 15 нче октябренә кадәр эшләячәк.