«Ялкын» - дуслык учагы

12 март көнне Казан шәһәренең 10 гимназиясендә (Копылов ур.,11) “Ялкын” журналы редакциясе белән укучылар арасында очрашу була. Бу очрашу, журналның чыга башлавына 85 ел тулу уңаеннан, ТР Милли китапханәсенең вакытлы матбугат бүлеге тарафыннан оештырылды.

1924 нче елда Мәскәүдә татар-башкорт яшьләре өчен “Кечкенә иптәшләр” исемле журнал чыга башлый. 1928 елдан журнал “Октябрь баласы” дип атала. 1933 елда редакция Казанга күченә, журнал исә “Пионер каләме”нә әверелә. 1941нче елда, сугыш башлангач, журнал чыгудан туктала. 1951 нче елда журнал “Пионер” дигән исеме белән яңадан чыга башлый. Ә 1957 нче елны “Ялкын”га әйләнә

“Ялкын” журналы яшүсмерләрнең кумирлары – күренекле спортчылар, сәхнә “йолдызлары” турындагы, шулай ук, чит илләрдәге яштәшләре тормышына, мода яңалыкларына багышланган мәкаләләре белән укучыларны үзенә җәлеп итеп тора. Журналның Мәскәүдә уздырылган “Вакытлы матбугатның алтын фонды” Халыкара һөнәри күргәзмәсендә мактаулы исемгә лаек булуы да аның профессиональ әзерлекле, яхшы сыйфатлы , укучылар белән бер телдә сөйләшүче журнал икәнен раслый.