25 март – Мәдәният хезмәткәрләре көне

2009 елның 25 мартында Россиядә икенче тапкыр Мәдәният хезмәткәрләре көне билгеләп үтелә. Әлеге бәйрәм халыкның рухи сәламәтлеген ныгытуда мәдәниятнең әһәмиятле урын алып торуын раслый.

Шушы уңай белән Татарстан Милли китапханәсендә төрле чаралар уздырыла.

Хәзерге тормышта вакытлы матбугатның урынын яктыртуга багышлап Татарстан Милли китапханәсенең вакытлы матбугат бүлеге хезмәткәрләре тарафыннан әзерләнгән радиокүзәтү 22 март көнне «Татарстан дулкынында» тапшыруында яңгырады. Шулай ук театр, музей, концерт һәм күргәзмә залларының, китапханәләрнең, сәнгать мәктәпләренең эшен яктыртучы газета-журналлардан торган күргәзмә дә куелды.

24, 25, 26 һәм 30 март көннәрендә Татарстан Милли китапханәсенең сәнгать бүлегендә ТИСБИ идарә академиясе студентлары өчен Ачык ишекләр көне үткәрелә. Монда студентларны китапханә хезмәтләреннән файдалану кагыйдәләре, бүлек фондлары һәм каталоглары белән таныштырачаклар, шулай ук китапханә буйлап экскурсия дә оештырылачак. Бу чараның барлык катнашучыларына бушлай укучы билетлары тапшырылачак.