Ел китабы

Татарстан Республикасының Милли китапханәсе Мәдәният министрлыгы белән берлектә һәр елны үткәрелә торган «Ел китабы» конкурсына йомгак ясады.

Конкурста 129 басма китап катнашты, шуларның 43е чәчмә әсәрләр (проза), 41е тезмә әсәрләр (шигърият), 23е балалар әдәбияты китаплары, 22се рус телендә чыккан матур әдәбият китаплары.

Татарстан нәшриятларында 2007 нче елда дөнья күргән, 2008 нче ел дәвамында иң күп укылган китапны билгеләүдә республикабызның 46 үзәкләштерелгән китапханәләр системасы катнашты.

2009 нчы елның 2 апрелендә язучы Рафаил Мостафин җитәкчелегендәге жюри җиңүчеләрне билгеләде.

Чәчмә әсәрләр буенча:
1 урында – Фоат Садриевның «Бәхетсезләр бәхете»;
2 урында – Альберт Хәсәновның «Җәнбәт җәвере»;
3 урында – Рәфкать Кәраминең «Олы юл да сикәлтәле» китаплары.

Тезмә әсәрләр буенча:
1 урында – Зөлфәтнең «Ходай сулышы»;
2 урында – Флера Гыйззәтуллинаның «Башкаемда дөнья исәпләре»;
3 урында – Мөхәммәт Мирзаның «Тере су» шигырь җыентыклары.

Балалар әдәбияты буенча:
1 урында – Талия Шакирова төзегән «Журнал укучы жираф»;
2 урында – Бикә Рәхимованың «Җайдак малай»;
3 урында – Нәкыйп Каштановның «Күчтәнәч» китаплары.

Рус телендә чыккан матур әдәбият буенча:
1 урында – Разил Вәлиевнең «Строки жизни»;
2 урында – Борис Вайнерның «Нинзя из Самураевки?»;
3 урында – Равил Бохараевның «Золотые ступени» һәм Әхәт Мушинский белән Әхәт Сафиуллин тарафыннан төзелгән «Устами татарского народа» китаплары.

«Ел китабы – 2007» конкурсының йомгаклау һәм җиңүчеләрен бүләкләү тантанасы 2009 елның 21 апреле көнне Татарстан Республикасы Милли китапханәсенең төп бинасында булачак. Башлана 13.00 сәгатьтә.