М.Ю.Лермонтовның тууына 195 ел тулу уңаеннан

М.Ю.Лермонтовның тууына 195 ел тулу уңаеннан Татарстан Милли китапханәсенең күргәзмәләр залында (Кремль урамы, 33) ачылган китаплар күргәзмәсен карарга чакырабыз.
М.Ю.Лермонтов иҗаты рус поэзиясенең Пушкиннан соңгы чорындагы иң югары баскычында тора һәм рус прозасында яңа чор башлангычы булып санала. Ул шулай ук үзенең геройлары, аларның үзара мөнәсәбәтләре аша укучыга бөтенләй башка төрле, үзенчәлекле хисләр һәм фикерләр дөньясын ача. Әлеге дөнья егерме җиде яшендә вафат булган яшь егет тарафыннан тудырылган. 13 елга да тулмаган әдәби эшчәнлегендә ул 400 шигырь, 30га якын поэма, 6 драма һәм 3 роман иҗат иткән. Романнарының берсе – «Безнең заман герое». Лермонтовның дөньядан китүе рус әдәбияты өчен зур югалту булган, ләкин, шуны ассызыкларга кирәк, ул үзенең кыска гына иҗаты белән XIX гасыр рус әдәбияты классиклары плеядасында иң алдынгы урынны алып тора.
Күргәзмәдә язучының әсәрләре һәм аның иҗатына багышланган әдәбият куелган. Тәкъдим ителгән басмалар М.Ю.Лермонтовның язмышы һәм иҗаты, аның дуслары һәм дошманнары, шул чорның чынбарлыгы, шулай ук әдипне фаҗигале үлемгә дучар иткән сәбәпләр белән танышырга ярдәм итә.
Күргәзмә белән танышу М. Ю. Лермонтов әсәрләре буенча төшерелгән видеофильмнар күрсәтү белән кушылып бара.
Күргәзмә октябрь ахырына кадәр дәвам итә.