«Идел» журналына – 20 ел

Татарстан Республикасы Милли китапханәсенең вакытлы матбугат бүлеге 2009 елның 22 сентябрендә Казан театр училищесының беренче курс студентларын үзенә чакырды. Бүлек хезмәткәрләре күзәтү-таныштыру рәвешендә экскурсия уздырып, фонд хәзинәләрен кыскача тасвирлап бирделәр.
Россиядә – Яшьләр, Татарстанда – Спорт һәм сәламәт яшәү рәвеше елы уңаеннан әзерләнгән күргәзмә укучыларда зур кызыксыну уятты.
Шушы елның июль аенда «Идел» яшьләр журналының чыга башлавына 20 ел тулды. Бүлек фонды басмаларыннан әзерләнгән «Сөй халыкны, сөй «Идел»не» дип исемләнгән күргәзмә һәм бүлек хезмәткәрләре әзерләгән күзәтү аша укучылар журналның үткәне һәм бүгенгесе белән таныштылар.
Шәһәребезнең барлык югары уку йортларында укучы беренче курс студентларын Татарстан Милли китапханәсенең бай фондлары белән танышырга чакырабыз.