«Казанский альманах»–Татарстан Милли китапханәсенең 145 еллыгына

Татарстан Милли китапханәсенә – 145 ел. Шушы уңайдан «Казанский альманах» журналы (2009.– №5.– Б.70-89) битләрендә Г.Зәйнуллинаның «Мәгълүмат галәмендә Милли китапханә йолдызлыгы» («Галактика в информационной Вселенной») исемле мәкаләсе һәм ТР Дәүләт Советы депутаты, Татарстан Милли китапханәсенең Химаячеләр шурасы рәисе Р.И.Вәлиев белән әңгәмәсе басылган.
Китапханәнең төп бинасы (Кремль ур., 33 йорт) – Казан шәһәренең иң матур архитектура корылмаларыннан берсе. Бу сәнгать әсәре сәүдәгәр һәм сәнәгатьче Алексей Ушков үтенече буенча 1906-08 елларда, аның сөекле хатыны Зинаида Ушковага бүләк сыйфатында, талантлы мигъмар Карл Мюфке тарафыннан тудырыла.
Милли китапханәнең К.Маркс урамындагы 36 нчы йортка урнашкан өч катлы икенче бинасы да архитектура җәһәтеннән бик матур.
Өченче бина Театр урамының 5 нче йортында урнашкан.
Бу әкияти гыйльми биналарга килеп, һәрбер кеше акыл һәм гүзәллек чишмәсеннән авыз итә ала.
Мәкалә авторы китапханәдәге бүлекләр, аларның тарихы, киләчәккә уй-ниятләре хакында сөйләп, укучыларга күңелле һәм файдалы сәяхәт бүләк итә.
«Казанский альманах» журналы, шулай ук башка бик күп төрле газета һәм журналлар белән Татарстан Милли китапханәсенең Вакытлы матбугат бүлегенә (К.Маркс ур., 36 йорт) килеп танышырга мөмкин.