«Бар тормышым ут хәзер»

Татар шигъриятенең күренекле вәкиле Сәгыйть Рәмиевнең тууына 130 ел тулу уңаеннан ТР Милли китапханәсенең Зур уку залында (Кремль ур. 33) «Уйласам уй, сызлый күңлем, сызлый җан...» дип исемләнгән күргәзмә оештырылды.
Рәмиев Сәгыйть Лотфулла улы (1880-1926) – күренекле шагыйрь, драматург, публицист һәм тәрҗемәче. «Таң йолдызы» газетасының җаваплы мөхәррире, «Тавыш» газетасын, «Таң мәҗмугасе» журналын оештыручыларның берсе.
Күргәзмәдә Сәгыйть Рәмиевнең ХХ гасыр башында Казан, Уфа шәһәрләрендә дөнья күргән китаплары белән танышырга мөмкин. Шагыйрьнең төрле елларда «Шура», «Аң», «Безнең юл» һ.б. журналларда басылган әсәрләре һәм аның иҗатына карата әдәби тәнкыйть мәкаләләре, «Таң йолдызы» газетасы титул битенең ксерокүчермәсе куелган. Шулай ук күргәзмәдә әдипнең сайланма әсәрләре һәм иҗаты, шәхесе турында фәнни-монографик хезмәтләр дә урын алган.
Күргәзмә 1 апрельгә кадәр эшләячәк.