Болгар һәм Зөя шәһәрләренең тарихи ядкәрләре – Татарстан Республикасы байлыгы

Татарстан Республикасы Милли китапханәсенең Кулъязмалар һәм сирәк китаплар бүлеге тарафыннан әнә шундый темага күргәзмә оештырылды. Күргәзмә ХIV–ХVI гасырларга караган, Болгар һәм Зөя җирлекләрендә урнашкан мәдәни-тарихи һәм архитектура ядкәрләренә багышланган ХIХ йөз–ХХ йөз башы китаплары һәм хариталары белән таныштыра. Биредә Казан галимнәре – тарихчылар, археологлар, сәнгать белгечләре – Н.Ф.Высоцкий, Р.М.Мортазин, И.А.Ардашев, П.М.Дульский һ.б. ларның хезмәтләре урын алган.

Болардан тыш, күрәзмәдә Болгардагы Кара пулатның, Кече манараның, Олуг Җәмигъ мәчете харәбәләренең, Болгар шәһәре манзарасының сурәтләрен; чиркәү төзелеше сәнгате үрнәкләренең – Зөя ныгытмасында урнашкан Успения соборы архитектурасының, ХIV гасырдан сакланып калган башка храмнардагы фрескаларның – фотоларын һәм рәсемнәрен күрергә мөмкин.

Болгар һәм Зөя корылмалары Татарстан Республикасы җирлегендә урын алган уникаль тарихи, мәдәни истәлекләрдән саналалар, алар төбәк күләмендә генә түгел, ә дөньякүләм әһәмияткә ия.

Күргәзмә Татарстан Республикасы Милли китапханәсенең төп бинасындагы (Казан, Кремль ур., 33 йорт) Зур уку залында 2011 нче елның 1 нче маена кадәр эшләячәк.

Рәхим итегез!