Китап бәйгесе

Татарстан Республикасының Милли китапханәсе Мәдәният министрлыгы, Республика матбугат һәм массакүләм коммуникацияләр агентлыгы белән берлектә үткәрелә торган “Ел китабы – 2009” конкурсына йомгак ясады.

Конкурста 114 китап катнашты, шуларның 28е чәчмә әсәрләр (проза), 36сы тезмә әсәрләр (шигърият), 26сы балалар әдәбияты, 24е рус телендә чыккан матур әдәбият китаплары.

Татарстан нәшриятларында 2009 нчы елда дөнья күргән, 2010 нчы ел дәвамында иң күп укылган китапны билгеләүдә республикабызның 45 үзәкләштерелгән китапханәләр системасы катнашты.

2011 нче елның 7 апрелендә конкурсның жюрие җиңүчеләрне билгеләде.

Чәчмә әсәрләр буенча:
1 нче урында – Мөхәммәт Мәһдиевның “5 томлык сайланма әсәрләре”;
2 нче урында – Зифа Кадыйрованың “Көтеп узган гомер”;
3 нче урында – Халисә Ширмәннең “Язмышлардан юк ла узмышым” китаплары.

Тезмә әсәрләр буенча:
1 нче урында – Гамил Афзалның “Рәхмәт!”;
2 нче урында – Мөхәммәт Мирзаның “Адәм баласы” шигырь җыентыклары;
3 нче урында – Рәдиф Гаташның “3 томлык сайланма әсәрләре”

Балалар әдәбияты буенча:
1 нче урында – Габдулла Тукайның “Шүрәле”;
2 нче урында – Балачак энциклопедиясе. 1нче китап;
3 нче урында – Гамирҗан Дәүләтшинның “Борын-борын заманда...” һәм Фаяз Хуҗинның “Кол Гали. Кол Шәриф. Сөембикә” китаплары.

Рус телендә чыккан матур әдәбият буенча:
1 нче урында – Михаил Туруновскийның “Сказки для маленькой дочки” китабы;
2 нче урында – “Казанский альманах” җыентыгы.

2011 елның 29 апрелендә 13 сәгать 30 минутта Татарстан Республикасы Милли китапханәсенең уку залында (Казан, Кремль ур., 33 йорт) язучылар, рәссамнар, артистлар, нәшрият җитәкчеләре, мәдәният хезмәткәрләре, китап сөючеләр катнашында “Ел китабы – 2009” бәйгесенә йомгак ясау тантанасы узачак.