Социологик сораштыру

Татарстан Республикасы Милли китапханәсендә «Китапханәче укучы турында: китапханәдә аралашу үзенчәлекләре» дигән социологик сораштыру уздырылды. Анда китапханә хезмәткәрләре катнашты, чөнки китапханә укучыларына хезмәт күрсәтү аларның мөһим бурычлары булып тора.
Китапханәдәге аралашу төрләре рәтендә китапханәче һәм укучының үзара мөнәсәбәте зур роль уйный. Мондый аралашуның сыйфатыннан китапханәнең җәмгыятьтәге дәрәҗәсе һәм җәмгыятьнең китапханәләргә йөкләгән бурычларын үтәү уңышлылыгы билгеләнә.
Сораштыруның максаты – китапханәдәге аралашулар дәвамында китапханәче һәм укучы арасындагы мөнәсәбәтләрне камилләштерү, шуның белән бәйле рәвештә китапханәдә хезмәт күрсәтүнең нәтиҗәлелеген арттыру. ТР Милли китапханәсе хезмәткәрләренең укучылар белән аралашу характерын, аралашуда булган каршылыкларны билгеләү, нәкъ менә шушы китапханә өчен хас булган бәхәсле ситуацияләрне өйрәнү һәм алардан чыгу юлларын эзләү, китапханәче һәм укучы арасындагы мөнәсәбәтләрне камилләштерү буенча тәкъдимнәр әзерләү социологик сораштыруның бурычлары булып торды.