Китаплар буенча балалар өчен төшерелгән 4 алман фильмы
Балалар һәм яшүсмерләр өчен кинокартиналар төшерелеп, аларның зур экраннарга чыгуы дәвам итә. Алман киноакадемиясе номинацияләре арасында хәтта «Балалар өчен иң яхшы фильм» дигән аерым категория дә бар. Шундый фильмнарның берничәсен Сезнең игътибарга тәкъдим итәбез. Китаплар һәм фильмнар Милли китапханәнең Алман уку залы фондында бар.
«Кнопка һәм Антон» (Anton und Pünktchen): 1953 елда режиссер Томас Энгель һәм 1999 елда режиссер Каролине Линк төшергән. Бу фильмнар Эрих Кестнерның балалар өчен язылган һәм югары бәяләнгән, 1931 елда дөнья күргән «Кнопка һәм Антон» романы буенча төшерелгән. Китап Кнопка кушаматын йөрткән Луиза исемле кызның һәм Антон исемле малайның дуслыгы турында сөйли. Балалар гаиләләренең социаль дәрәҗәләре белән аерылып тора. Кнопканың әти-әнисе байлар, ә Антонны әнисе ялгызы тәрбияли һәм акча җиткерә алмый. 1953 елгы аклы-каралы фильм әдәби әсәргә мөмкин кадәр якынайтып төшерелгән һәм Советлар Союзында яшәүчеләргә яхшы таныш иде. Бүгенге балаларга, һичшиксез, 1999 елгы фильм якынрак.
«Очучы сыйныф бүлмәсе» (Das fliegende Klassenzimmer): 2003 елда режиссер Томи Виганд һәм 1954 елда режиссер Курт Хоффман чыгарган. Джонатанга әле нибары 12 яшь, ә ул инде 6 мәктәп-интернатны алмаштырган. Лейпцигта ул яңа сыйныфташлары белән тиз арада уртак тел таба. Гамәлдән чыгарылган поезд вагонында алар «Очучы сыйныф бүлмәсе» спектакленең сценарий текстын табалар.
Шул ук авторның тагын бер әсәре «Бертөрле ике Лоттхен» (Das doppelte Lottchen) буенча 1950 елда режиссер Йозеф фон Баку һәм 2017 елда режиссер Ланцелот фон Наццо фильмнар төшергәннәр.
Луиза һәм Лотта исемле игезәкләрне кечкенәдән үк аералар. Луиза дирижер әтисе белән Венада, ә Лотта журнал редакторы булып эшләгән әнисе белән Мюнхенда үсә. 10 яшьләре тулгач, җәйге лагерьда очрашкач, сер ачыла. Әти-әниләренә яңадан кушылырга ярдәм итәр өчен балалар урыннары белән алмашыналар.
«Рико, Оскар һәм берсеннән берсе караңгырак күләгәләр» (Rico, Oskar und die Tieferschatten): режиссер Неле Леана Фолльмарның 2014 елгы фильмы. Рико һәм Оскар турындагы фильмнар (алар өчәү) алман язучысы Андреас Штайнхёфельнең китаплары сериясенә нигезләнеп төшерелгән. Төп герой итеп автор дөрес язу, санау кебек иң гади әйберләрне дә башкара алмаган малайны алган. Шуңа карамастан, ул олылар башкара алмаган гамәлләрне дә җиңел үти. Китап һәм фильмның төп мәгънәсе гади: башкалар кебек булмау – гадәти хәл, иң мөһиме – сине ничек бар, шулай кабул иткән дус табу.