Татар халык ашлары

Татар халкы элек-электән аш-суга осталыгы белән дан тоткан. Гасырлар дәвамында барлыкка килгән милли ашларыбыз хәзерге көнгә кадәр үзләренә хас сыйфатларны саклый. Ашларның үзенчәлеге халыкның яшәеш рәвешенә бәйле, тормыш хәле яхшыру hәм үзгәрү белән яңа ашлар, ризыклар барлыкка килә. Милли ашларның төрләре күбәя. Шулай ук башка милләтләрнең милли ризыклары татар ашларына зур йогынты ясамыйча калмый. Аш-су осталарыбыз әледән-әле яңа рецептлар уйлап таба, онытыла барган ашларны әзерләү турындагы киңәшләрне туплый. Татар милли ашлары бик күп төрле hәм башка халык ашларыннан төрле дәрәҗәдә аерылып тора.

Бүген бик күп кешеләр коронавирус инфекциясе таралуга бәйле рәвештә, санитар-эпидемиологик вәзгыять аркасында тулысынча үз-үзеңне изоляцияләү режимында, ягъни өйдә утыра. Татарстан Республикасы Милли китапханәсенең татар әдәбияты hәм туган якны өйрәнү бүлеге үз фондларында тәмле татар ашларын әзерләү турында биш дистәдән артык исемдәге китаплар саклануын хәбәр итә. Аларда татар халык ашлары рецептлары бирелгән, аларны әзерләү ысуллары өйрәтелгән, күбесе төсле рәсемнәр белән дә баетылган. Кызганыч, китапханәнең җәмәгатьчелекне үзендә кабул итүе вакытлыча туктатылды.

Хәзерге вакытта дөрес туклану – сәламәтлекне саклауның мөhим чарасы. Ул кешенең эш сәләтенә hәм озак яшәвенә уңай тәэсир итә. Шуңа күрә сыйфатлы аш-су әзерләү, азык-төлекне дөрес сайлый hәм файдалана белү, санитар-гигиена шартларын үтәү гаять зур әhәмияткә ия.

Милли китапханәдә татар халык ашлары турында күптөрле китаплар барлыгын, үз-үзеңне изоляцияләү режимы узып, китапханә эшли башлагач, алар белән иркенләп танышу мөмкинлеге туачагын белеп тору аш-су яратучылар, хуҗабикәләр өчен кызыклы hәм файдалы булыр.