ТР мәдәният министры И.Х.Әюпованың һәм РФ Мәдәният министрлыгы пресс-төркемендә катнашучыларның китапханәдә булуы
Бүген ТР мәдәният министры И.Х.Әюпова, РФ Мәдәният министрлыгы пресс-төркемендә катнашучылар белән берлектә, Татарстан Республикасы Милли китапханәсенең Казан шәһәре Пушкин урамындагы 86 йортта урнашкан яңартылган бинасында булды. Пресс-төркемгә Министрлыкның пресса хезмәте референты, «Известия», «Вечерняя Москва» басмалары журналистлары, федераль блогерлар һ.б. кергән иде. Кунаклар өчен бина буйлап экскурсия оештырылды. Төрле тарихи чорлардагы татар язуына нигез булган биш татар алфавитының хәрефләрен үзенә туплаган кинетик инсталляция аларда зур кызыксыну тудырды. Күргәзмә залында кунакларны Эдуард Хәйруллинның авторлык күзаллавында бирелгән, соңгы йөз елда төшерелгән һәм республика тормышының төрле тармакларын сурәтләгән уникаль фоторәсемнәр каршылады. Китапханә фондларында сакланучы аеруча кыйммәтле һәм сирәк басмалардан, кулъязмалардан, фотосурәтләрдән һәм патентлардан торган экспозициянең дә тәэсире хәтерләргә уелырлык иде. «Moñ» дип аталган күпфункцияле, заманча мультимедиа җиһазлар куелган театраль мәйданчык чын мәгънәсендә гаҗәпләндерде дә, сокландырды да. Аны «Җанлы шәһәр» фонды директоры Инна Яркова тәкъдим итте.
Экскурсия тәмамланганнан соңгы әңгәмә-фикерләшү, китапханәнең каһвәханәсендә сыйлану белән бергә, иркен һәм формальлектән азат рәвештә узды.
Китапханәдә булу Россия Федерациясе мәдәният министры О.Б.Любимованың Татарстан Республикасында «Мәдәният» илкүләм проектын гамәлгә ашыру буенча чаралар үткәрүдә катнашуы кысаларында оештырылды.
