Татарстан Республикасы Милли китапханәсенең вакытлы матбугат бүлеге, иҗтимагый-сәяси «Татарстан» журналының 100 еллык юбилеена багышлап, «Бер гасыр тарихлы Татарстан яшьтәше» дигән виртуаль күргәзмә тәкъдим итә.
Күргәзмәдә журналның төрле исемнәр белән («РКП(б)ның Татарстан өлкә комитеты хәбәрләре», «Агитатор юлдашы», «Коммунистик юл», «Ильич юлы», «Причал», «Татарстан коммунисты», «Татарстан»), төрле елларда дөнья күргән аерым басмалары (саннары), шулай ук газеталарда чыккан мәкаләләр урын алды.
Күргәзмәдәге материаллардан журналның үткәне һәм бүгенгесе турында бик күп кызыклы мәгълүмат алырга мөмкин. Аның сәхифәләре татар һәм рус телләрендә Татарстанның сәяси, икътисади, рухи һәм мәдәни тормышы турындагы иң мөһим мәсьәләләрне яктырта.