«Бөек Ватан сугышы елларында Татарстан» дигән электрон материаллар җыентыгы – Бөтенроссия конкурсы лауреаты
Мәдәният һәм сәнгатькә караган иң яхшы электрон басмаларның VII нче Бөтенроссия смотр-конкурсындагы «Бөек Җиңүгә багышлана» дигән номинациядә «Татарстан Бөек Ватан сугышы елларында» дип аталган электрон материаллар җыентыгы лауреат исеменә лаек булды.
2020 ел ахырында «Китапханәче һөнәре һәм китапханәләрнең фәнни-мәгариф эше» дигән темага Россиянең федераль һәм төбәкләрдәге үзәк китапханәләре җитәкчеләренең еллык киңәшмәсе узды. Коронавирус пандемиясе сәбәпле әлеге чара онлайн форматта үтте. Киңәшмәдә катнашу өчен Россия Федерациясенең 70 регионыннан 275 кеше теркәлде. Россия Милли китапханәсенең youtube-каналында 2 көндә 4600 һәм 2200 тоташу булды. Киңәшмәне РФ Мәдәният министрлыгы, Россия Милли китапханәсе һәм Россия Дәүләт китапханәсе оештырды.
Киңәшмә ахырында 2020 ел дәвамында үткәрелгән VII нче Бөтенроссия смотр-конкурсына нәтиҗә ясалып, иң яхшы электрон басмалар билгеләнде. Китапханәләрнең мәгълүмат эшчәнлеген көчәйтүгә һәм инновацион активлыгын үстерүгә булышуны максат иткән әлеге бәйгенең төп оештыручысы Россия Дәүләт китапханәсе булды.
2020 елгы смотр-конкурска 2016–2020 елларда китапханәләр тарафыннан мөстәкыйль яки башка оешмалар белән берлектә эшләнгән челтәрле һәм локаль электрон басмалар тәкъдим ителде.
Россиянең барлык федераль округларындагы 36 субъектында урнашкан 78 китапханәдән смотр-конкурска 94 гариза керде. Бәйгедә катнашкан китапханәләр арасында 29 дәүләт китапханәсе, шулар арасында 23 үзәк региональ китапханә, 4 балалар үзәк региональ китапханәсе, 1 сукырлар региональ китапханәсе, 1 сукырлар федераль китапханәсе (Россия Дәүләт сукырлар китапханәсе), 49 муниципаль китапханә бар иде.
Басмалар 3 номинациядә көч сынашты:
- «Мәдәният һәм сәнгатькә караган иң яхшы электрон басма»,
- «Бөек Җиңүгә багышлана»,
- «Балалар һәм яшүсмерләр укуына ярдәмгә».
Күпчелек гаризалар «Бөек Җиңүгә багышлана» номинациясенә тәкъдим ителгән иде.
«Татарстан Бөек Ватан сугышы елларында» электрон җыентыгы Россия Федерациясендә игълан ителгән Дан һәм хәтер елына, Бөек Ватан сугышында Җиңүнең 75 еллыгына һәм ТАССР оешуның 100 еллыгына багышланды.
Төп максат – Татарстанның Бөек Җиңүгә керткән өлешен төрле яклап күрсәтү. Җыентыкның бүлекләренә сугышта катнашучыларның һәм тыл хезмәтчәннәренең Бөек Ватан сугышы елларындагы каһарманлыгын сурәтләгән мәгълүмати чыганаклар, Кызыл Армиянең Татарстанда формалашкан хәрби частьләре һәм аларның сугышчан юлы, республикада бу еллардагы мәдәният торышы һ. б. турында материаллар тупланган.
Электрон җыентык кирәкле сайтларга, электрон документларга, Бөек Ватан сугышында катнашкан мәдәният әһелләренә багышлап Милли китапханә тарафыннан төзелгән электрон белешмәлекләргә, төрле мәгълүмати (текстлы һәм библиографик, шул исәптән уникаль) чыганакларга, китап һәм видеоматериалларга сылтамаларны да үз эченә ала.
