Икенче мемориаль Кәримуллин укулары

2010 елның 9 июле көнне Татарстан Республикасының Саба районында мәшһүр фән эшлеклесе, академик Ә.Г.Кәримуллин истәлегенә багышланган «Икенче мемориаль Кәримуллин укулары» булды.

Икенче Кәримуллин укуларын республикабызның Саба районы хакимияте һәм районның үзәкләштерелгән китапханәләр системасы, шулай ук Татарстан Республикасының Милли китапханәсе оештырды.

Укуларның программасы бик бай булды. Катнашучылар Кәримуллин исемен йөртүче Үзәк китапханә эше белән таныштылар, Әбрар Кәримуллинга багышлап экспозиция куелган район музеен карадылар. Китапханә һәм музей хезмәткәрләре галим исемен мәңгеләштерү юнәлешендә алып барыла торган эшчәнлекләре турында сөйләделәр. Ә.Г.Кәримуллинның төп Ватаны булган Чәбия-Чүрчи авылына бару, галимнең һәм аның җәмәгате Кинтә ханымның каберләре янында дога кылу, чәчәкләр салу чараның тагын бер тәэсирләндергеч өлеше булды. Алга таба Урман хуҗалыгы бистәсенең мәдәният йортында конференция өлеше башланды.

Конференция эшендә республикабызның дәүләт эшлеклеләре, язучылар, Г.Ибраһимов исемендәге Тел, әдәбият һәм сәнгать институты, Казан дәүләт мәдәният һәм сәнгать институты галимнәре, Татарстан Республикасы Милли китапханәсе хезмәткәрләре, Саба районының мәдәният һәм мәгариф тармагы эшчеләре, гаммәви мәгълүмат чаралары вәкилләре катнашты.

Саба районы хакимияте башлыгы Р.Н.Миңнеханов, район Башкарма комитеты җитәкчесе Т.Г.Шәрәфиев конференциядә катнашучыларга сәламләү сүзләре белән мөрәҗәгать иттеләр. Конференциядә милли китапчылык мәсьәләләренә караган эчтәлекле докладлар һәм чыгышлар тыңланды, Әбрар Гыйбадулла улын якыннан белгән дусларының, хезмәттәшләренең, шәкертләренең тәэсирле хатирә-истәлекләре яңгырады.