Нәҗип Җиһановның тууына 110 ел

Татар профессиональ музыка сәнгатенә нигез салучыларның берсе, СССРның халык артисты, Социалистик Хезмәт Герое, күренекле композитор, педагог, җәмәгать эшлеклесе Нәҗип Гаяз улы Җиһановның тууына 110 ел тулу уңаеннан Татарстан Республикасы Милли китапханәсе сайтында «Нәҗип Җиһанов» электрон белешмәлеге тулыландырылды.

Нәҗип Җиһановның күпкырлы эшчәнлеге аны Татарстанда гына түгел, Россия күләмендә дә ХХ гасыр музыка мәдәниятенең иң талантлы вәкилләренең берсе итеп танытты.  

Композитор 8 опера, 3 балет, 17 эре симфоник әсәр, сюиталар, җырлар, күп санлы камера, вокаль һәм инструменталь әсәрләр авторы. Татарстанда бүген гамәлдә булган музыка сәнгате учреждениеләре һәм оешмаларының барысы да диярлек (Казан дәүләт консерваториясе (академиясе), Муса Җәлил исемендәге Татар дәүләт опера һәм балет академия театры, ТР Дәүләт симфоник оркестры, ТР Композиторлар берлеге, Казан махсус урта музыка мәктәбе (хәзер  − консерватория каршындагы лицей) Н. Җиһанов җитәкчелегендә һәм аның турыдан-туры катнашында ачыла.

Нәҗип Җиһановның 100 еллыгы уңаеннан төзелгән электрон белешмәлек яңа методик материаллар, презентацияләр, видеоязмалар, аудиоязмалар белән баетылды. Анда соңгы 5 ел эчендә дөнья күргән материаллар, яңа чыганаклар өстәлде.